မင်းသားကျော်သူ မွေးနေ့ အနုပညာပြပွဲ ကျင်းပ

Monday, 02 November 2009 18:01 အေးလဲ့

လူမှုရေး လုပ်ငန်းများဖြင့် ထင်ရှားနေသည့် ရုပ်ရှင် သရုပ်ဆောင် ကျော်သူက ယနေ့ ကျရောက်သည့် သူ၏ အသက် ၅၀ ပြည့် မွေးနေ့ တွင် မိတ်ဆွေများကို ရန်ကုန်မြို့ နေအိမ်သို့ ဖိတ်ခေါ်ပြီး သူဖန်တီးထားသော ပန်းချီနှင့် ဓာတ်ပုံများ ပြသခဲ့ကြောင်း ဧရာဝတီကို ပြောသည်။

“ကျနော်က ရုပ်ရှင် ရိုက်ခွင့်မရတော့ဘူးလေ၊ အနုပညာသမား ဆိုတော့ တခုခု ဖန်တီးမှ ရမယ် ဆိုပြီး ကျနော် ရိုက်ထားတဲ့ ဓာတ်ပုံနဲ့ ပန်ချီးကားတွေကို ပြတာပါ” ဟု ကျော်သူက ဧရာဝတီကို ပြောသည်။

အာဏာပိုင်တို့က ၂၀၀၇ ခုနှစ် သံဃာ့လှုပ်ရှားမှုတွင် ပါဝင်ကူညီခဲ့သော သရုပ်ဆောင် ကျော်သူကို ရုပ်ရှင်ရိုက်ကူးခွင့် ပိတ်ပင်လိုက်သည်။ ရုပ်ရှင်ဇာတ်ကား နည်းပါးနေသဖြင့် ယခင်က ရိုက်ကူးပြီးခဲ့သော ကျော်သူ၏ ဇာတ်ကားများကိုမူ ရုံတင်ပြသခွင့် ပြုသည်ဟု ဆိုသည်။

ရုပ်ရှင်နယ်တွင် လှုပ်ရှားခွင့် တားမြစ်ခံထားရသည့် ကျော်သူ၏ ယနေ့ ပြပွဲတွင် ပန်းချီကား ၂၃ ကား၊ ဓာတ်ပုံ ၄၀ ခန့် ပါဝင်သည် ဟုဆို သည်။

ပန်းချီကားများမှာ ရောင်းရန် မဟုတ်ကြောင်း၊ ငြိမ်းချမ်းရေးကို အဓိက သရုပ်ဖော် ရေးဆွဲထားခြင်း ဖြစ်ကြောင်း ကျော်သူက ပြောသည်။

“တကမ္ဘာလုံးမှာ စစ်မဖြစ်ဘဲ၊ စစ်အုပ်ချုပ်ရေးအရ ကင်းလွတ်ပြီး ငြိမ်းငြိမ်းချမ်းချမ်းနဲ့ ဖြစ်စေချင်တယ်။ ကျနော် သဘောအကျဆုံး ပုံက War and Peace (စစ်နဲ့ငြိမ်းချမ်းရေး) ဆိုတဲ့ ပုံရယ်၊ နောက်တပုံက Woman Leadership (အမျိုးသမီးခေါင်းဆောင်မှု) ဆိုပြီး ကျနော် နာမည်ပေးထားတဲ့ နောက်ခံ အမည်းကြီးမှာ အဖြူရောင် ရွှေဇီးကွက်ရုပ်၊ ပစ်တိုင်းထောင်က အမျိုးသမီးပုံပေါ့လေ ပါးကွက်နဲ့ ပုံပါ” ဟု ကျော်သူက သူနှစ်သက်သည့် ပန်းချီကားတချို့အကြောင်း ရှင်းပြသည်။

မွေးနေ့ပြပွဲမှ ဓာတ်ပုံများအကြောင်းကိုလည်း မွေးနေ့ရှင် ကျော်သူက ပြောပြသည်။

“ဓာတ်ကြိုးပေါ်မှာ အုပ်စုလိုက် ငှက်တွေ၊ နောက်တော့ တကောင်ပဲ ကျန်ခဲ့တယ်၊ အဲဒီပုံလေးကို ကျနော် သစ္စာဖောက် လို့ နာမည်ပေး ထားတယ်” ဟု ဓာတ်ပုံတပုံနှင့် ပတ်သက်ပြီး သူက အဓိပ္ပာယ် ဖွင့်ပြသည်။

ဓာတ်ပုံများမှာ ၂၀၀၈ ခုနှစ် နာဂစ်မုန်တိုင်း ဒုက္ခသည် ကယ်ဆယ်ရေး ကာလအတွင်း ရိုက်ကူးထားခြင်း ဖြစ်သည်ဟု ဆိုသည်။

ဦးကျော်သူသည် ရုပ်ရှင်လောကတွင် သရုပ်ဆောင် နှင့် ဒါရိုက်တာ အဖြစ် ၂၅ နှစ်တိုင် ဖြတ်သန်းခဲ့သူ ဖြစ်သည်။ ၁၉၈၄ ခုနှစ်တွင် သူပါဝင်သရုပ်ဆောင်ထားသည့် “ချစ်ကြိုးလေး နှစ်မျှင်” ဇာတ်ကားဖြင့် စတင် အောင်မြင်လာသည်။

နောက်ဆယ်နှစ်အကြာတွင် သူပါဝင်သရုပ်ဆောင်ခဲ့သော “တပြည်သူမရွှေထား” ဇာတ်ကားဖြင့် ရုပ်ရှင်ထူးချွန်ဆု ရခဲ့သဖြင့် အကယ်ဒမီကျော်သူ ဖြစ်လာသည်။ ဒါရိုက်တာအဖြစ် သူရိုက်ကူးခဲ့သည့် “အမေ့ နို့ဖိုး” ဇာတ်ကားဖြင့် ၂၀၀၃ ခုနှစ်အတွက် ဒါရိုက်တာဆု ရရှိခဲ့သည်။

ယခုအခါ ရုပ်ရှင်လောကတွင် ပိတ်ပင်ခံနေရသော ကျော်သူသည် သူ၏ လူမှုကူညီရေးလုပ်ငန်းကို ယခင်ကထက် အာရုံစိုက်ပြီး လုပ်ကိုင်နေသည်။

ကျော်သူက အစိုးရနှင့် မသက်ဆိုင်သည့်၊ နိုင်ငံရေးနှင့်လည်း ပတ်သက်ခြင်း မရှိသည့် နာရေးကူညီမှု အသင်းကို ၂၀၀၁ ခုနှစ် ဇန်န၀ါရီလတွင် တည်ထောင်ခဲ့ပြီး ပြည်တွင်းပြည်ပ အလှူရှင်တို့၏ လှူဒါန်းငွေများဖြင့် ရန်ကုန်မြို့ ဈာပန လုပ်ငန်းများကို အခမဲ့ ကူညီလျက်ရှိသည်။ မင်းသားကျော်သူ၏ အသင်းသည် နေ့စဉ် ရန်ကုန်မှ ဈာပန ၅၀ ခန့်ကို ကူညီသဂြိုဟ်ပေးသည့် လူမှုရေး လုပ်ငန်းကြီး ဖြစ်နေသည်။

ပြီးခဲ့သည့်နှစ်များအတွင်း အာဏာပိုင်များက ကျော်သူ၏ လှုမှုရေးလုပ်ငန်းများကို အနှောက်အယှက် ပြုလုပ်သည်ဟူသော သတင်းများ လည်း ထွက်ပေါ်ခဲ့သည်။

၂၀၀၇ ခုနှစ်တွင် “သုခ” ဆေးခန်းကို ဖွင့်လှစ်ပြီး လူမှုရေး လုပ်ငန်းများကို တိုးချဲ့လိုက်သည်။

ဤအတောအတွင်း ကျော်သူ ဦးစီးသည့် ဒဂုံမြို့သစ် မြောက်ပိုင်းရှိ ကုသိုလ်ဖြစ်ဆေးခန်းသည် ဒေသခံ အာဏာပိုင်တို့၏ ဖိအားပေးခြင်း နှင့် ရင်ဆိုင်နေရသည်။ ထိုဆေးခန်းမှာ တရက်လျှင် လူနာအယောက်၂၀၀ ကျော်ကို အခမဲ့ ကုသပေးနေသော ဆေးခန်းဖြစ်သည်ဟု သိရသည်။