ဆောင်းပါးသရုပ်ဖေါ် © မင်းကျော်
မြန်မာ့ နိုင်ငံရေး ကို စိတ်ဝင် တစား လေ့လာနေသူများ အားလုံး စိတ်ဝင်စားနေသော မေးခွန်း တခု ရှိသည်။ ထို မေးခွန်း မှာ " ၂၀၁၀ ရွေးကောက်ပွဲ ပြီးရင် မြန်မာနိုင်ငံမှာ ဘာတွေ ပြောင်းလဲ သွားမှာလဲ" ဆိုသည့် မေးခွန်းပင် ဖြစ်သည်။
အချို့ကလည်း ရွေးကောက်ပွဲ အတွက် မဝံ့မရဲ အကောင်းမြင် ကြတာ မျိုးရှိသည်။ အဲလို မြင်သူအချို့ တွင် လည်း ပြင်ပ
အတိုက် အခံဘက် မှ ပုဂ္ဂိုလ်များ လည်း ပါဝင် လာခဲ့ ပေသည်။ အချို့ ကြတော့လည်း
"ဒီသောက်စစ်အစိုးရလုပ်တဲ့ ရွေးကောက်ပွဲကို ဘာတွေများ မျှော်လင့်နေရဦးမှာလဲ။ အဲဒီအာဏာရူးတွေက သူတို့စိတ်ကြိုက် လုပ်ချင်တာလုပ်ဖို့ ဒီရွေးကောက်ပွဲကြီးကို အင်ထုထားတာ"
ဆိုပြီး အယုံအကြည်မရှိ အဆို တင်သွင်း ကြသည်။ တကယ်တော့ ပြောတဲ့ သူတွေလည်း အလွန် မဟုတ်ချေ။ မြန်မာ နိုင်ငံတွင် စစ် အစိုးရ အာဏာရ လာပြီးကတည်း က ပြည်သူ လူထု အပေါ် ရိုးသားစွာ ဆက်ဆံ တာဆိုလို့ မရှိ သလောက်ပင် မဟုတ်ပါလား။ ထို့ကြောင့် လည်း ဗိုလ်ချုပ် မှူးကြီး သန်းရွှေ အမှူးပြုသော မြန်မာစစ်အာဏာရှင်တို့ စီစဉ်သော ရွေးကောက်ပွဲနှင့်ပတ်သတ်ပြီး တစ်စက်မှ အကောင်းမပြောချင်ကြတာ သိပ်တော့ မလွန်ပေ။
ထိုအခြေအနေ နှင့် ပတ်သတ်ပြီး ဗိုလ်ချုပ် မှူးကြီး သန်းရွှေ က မတ်လ ၂၇ ရက်နေ့တွင် ကျရောက်သော စစ် အစိုးရ အခေါ် တပ်မတော် နေ့ အခမ်းအနား တွင် ပြောကြား ခဲ့သောမိန့်ခွန်း က စစ်အစိုးရ ၏ သဘောထား ကို ပိုမို ထင်ဟပ် လာစေခဲ့သည်။ ဗိုလ်ချုပ် မှူးကြီး က ၎င်းစိတ်ကြိုက် ဖန်တီးထားသော မြို့တော်အသစ် နေပြည်တော် တွင် ကျင်းပသည့် စစ်ချီ အခမ်းအနားအတွင်း စစ်သည် ၁၃၀၀၀ ရှေ့တွင် မိန့်ခွန်း တစ်ရပ် မြွက်ကြား ခဲ့ရာ ၂၀၁၀ ရွေးကောက်ပွဲနှင့် စပ်လျဉ်းသော အချက်များလည်း ပါဝင်ခဲ့သည်။
ဗိုလ်ချုပ် မှူးကြီးက ၂၀၁၀ ရွေးကောက်ပွဲ တွင် ဒေါ် အောင်ဆန်း စု ကြည် ခေါင်းဆောင်သော NLD ပါတီကို လုံးဝပါဝင် ယှဉ်ပြိုင် ခွင့်ပြုမည် မဟုတ်ကြောင်း အတိအလင်း ထုတ်ဖော် ပြောဆို သွားသည်။ ဖွဲ့စည်းပုံ အခြေခံ ဥပဒေ သည် ပြည်သူ လူထု ၏ စိတ်ဆန္ဒ အတိုင်း ရေးဆွဲပြီး ဖြစ်သောကြောင့် ပြည်သူ က မလိုလားသော NLD ကို ထည့်သွင်း စဉ်းစားဖို့ မလိုကြောင်း ဗိုလ်ချုပ် မှူးကြီး သန်းရွှေ ကဆိုသည်။ သို့သော်လည်း ပြည်သူ လူထု အမှန်တကယ် အလိုမရှိသူ မှာ ဒေါ် အောင်ဆန်း စု ကြည် လား၊ ၎င်းကိုယ်တိုင်လားဆိုသည်ကိုမူ စစ်ခေါင်းဆောင်ကြီး အမှန်အတိုင်း သိလောက်ပါသည်ဟု ပြည်သူများက ယုံကြည်ပါလိမ့်မည်။
ဒေါ် အောင်ဆန်း စု ကြည် သည် မြန်မာ ပြည်သူများ သာမက ကမ္ဘာကပါ လေးစားရသော ခေါင်းဆောင် ကောင်း တစ်ယောက် ဖြစ်နေကြောင်း မှာ အလွန်ခိုင်မာသော အမှန်တရား တရပ် အဖြစ်သက်သေ ပြနေ ပါသည်။ ထိုသို့သော အမျိုးသမီးမျိုး ကိုမှ အတိုက်အခံ လုပ်နေရသော မြန်မာ စစ်အစိုးရ ခမျာ ဒေါ် အောင်ဆန်း စု ကြည် ကို အလွန်ကြောက် နေသည်မှာ လည်း တစ်ကမ္ဘာလုံး အသိပင်။ စစ် အင်အား နှင့် လက်နက် စွမ်းအား ကို မတရား အသုံးချကာ အာဏာ ကို အဓမ္မ သိမ်းပိုက် ထားသော အာဏာရူးတွေ အဖို့ ပြည်သူ က ထောက်ခံသော၊ ၁၉၉၀ ရွေးကောက်ပွဲတွင် ပြည်သူ့ ထောက်ခံမှု ကို လက်ဝယ် ပိုင်ပိုင် ရရှိခဲ့သော ဒေါ် အောင်ဆန်း စု ကြည် နှင့် NLD ပါတီကို ၂၀၁၀ ရွေးကောက်ပွဲ တွင် ပါဝင် ခွင့်ပြု လိုက်ပါက မျောက်မီး ခဲကိုင်သလို ဒုက္ခကြီး သွားမည် ကို မသိဘဲ မနေပါ။
NLD ပါတီကလည်း ၂၀၁၀ ရွေးကောက်ပွဲ ဝင်ရောက် ရန် အတွက် ဖွဲစည်းပုံ အခြေခံ ဥပဒေ ကို ပြန်လည် စဉ်းစား သုံးသပ် ရန် နှင့် တခြားသော လုပ်ဆောင်ချက်များ ပါသော အချက်အလက်များ အတွက် လည်း တောင်းဆို ထားခဲ့ သည်။ ထို့ကြောင့်လည်း သူတို့ ပါးစပ် ထဲတွင်ရှိသော အပုပ်ချ စကားလုံးတိုင်း ကို အားရပါးရ သုံးစွဲကာ ဒေါ် အောင်ဆန်း စု ကြည် ကို သိက္ခာ ချတော့သည်။ စစ် အစိုးရ ၏ အာဘော်အရ ဒေါ် အောင်ဆန်း စု ကြည် ခမျာ တိုင်းပြည် သစ္စာဖောက်ကြီး ဖြစ်လိုက်၊ ပုဆိန် ရိုးကြီး ဖြစ်လိုက်၊ အာဏာကို အာသာငမ်းငမ်း တပ်မက်သူကြီး ဖြစ်လိုက်နှင့် အကြီးစား ဗီလိန်ကြီး ဖြစ်နေ ရရှာသည်။ သို့သော်လည်း ပြည်သူများ ၏ စိတ် တွင် အပုပ်ချ ခံရသူ နှင့် အပုပ်ချနေသူ ဘယ်သူ့ အပေါ် မျက်မုန်းကျိုးနေသူ ကို စစ် အာဏာရှင်များ တိတိကျကျ သဘောပေါက် ဖို့လိုပါသည်။
၁၇ မိနစ်ကြာသော မိန့်ခွန်း အတွင်း ဗိုလ်ချုပ် မှူးကြီးသန်းရွှေ က ၎င်းအနေ နှင့် NLD အား မည်သည့် နည်း နှင့်မျှ လက်မတွဲ နိုင်ကြောင်း ၎င်း၏ သဘောထား ကို ပြောင်ပြောင် တင်းတင်း ကြေညာ ခဲ့ပြီး ဖြစ်သည်။ ၂၀၁၀ ရွေးကောက်ပွဲ သည် ကမ္ဘာ့နိုင်ငံများ မည်သို့ပင် ဖိအားပေး တောင်းဆိုမှုများ ရှိနေပါစေ၊ NLD မပါဘဲ ဆင်နွှဲရမည့် အခြေအနေ ရောက်နေ ပေတော့မည်။ စစ် အစိုးရ သည် နိုင်ငံတကာ အစိုးရ နှင့် မြန်မာ ပြည်သူများ ၏ လိုလားမှု ကို လုံးဝ ဂရုမစိုက်ကြောင်း ထင်ထင်ရှားရှား ပြသ ခဲ့ပြီး ဖြစ်သည်။ ၎င်း အနေ နှင့် ၁၉၉၀ ရွေးကောက်ပွဲ ရလဒ်ကို အပြီးတိုင် လက်စတုံး လိုက်ပြီး သေနတ် နှင့် ချိန်ကာ ထောက်ခံ မဲ ရယူထားသော ရွေးကောက်ပွဲ ဥပဒေ ကို အတည်ပြုရန် လုံးပမ်း လာခဲ့ပြီ ဖြစ်သည်။
ဒီမိုကရေစီ ပန်းတိုင် သို့ အရောက် ချီတက်ရန်ဟု ကြွေးကြော် ထားသော်လည်း ၂၀၁၀ ရွေးကောက်ပွဲ သည် မြန်မာ ပြည်သူတို့ ၏ ဆန္ဒ အမှန် နှင့် ဖီလာ ဆန့်ကျင်ပြီး စစ် အစိုးရ စိတ်ကြိုက် ပုံစံ ချထားသော အတုအယောင် ရွေးကောက်ပွဲ ကြီးမှန်း အသေအချာသိသော်လည်း ကမ္ဘာ ကရော၊ မြန်မာ ပြည်သူများ ကပါ ဘာမှ မတတ် နိုင်ချေ။ ကမ္ဘာ့ နိုင်ငံများ သည် ရိုက်ခတ် လာသော စီးပွား ပျက်ကပ်ကို အလူးအလဲ တုန့်ပြန် ကာကွယ်ရင်း ကိုယ့်နိုင်ငံ အရေးထက် မြန်မာ့ အရေးကို မည်သည့် နည်းနှင့်မျှ အာရုံ မစိုက်နိုင်ပေ။ ထို့အတူ စစ် အစိုးရ ၏ ၂၀၀၇ ခုနှစ်၊ စက်တင်ဘာ လူသတ်ပွဲကို မျက်ဝါး ထင်ထင် ကြုံတွေ့ ထားသည့် မြန်မာ ပြည်သူများ အနေနှင့် လည်း နောက်ထပ် တစ်ကြိမ် ရင်ထဲမှ ဆန္ဒများကို ကျည်ဆန် နှင့် ဖက်ပြိုင်ပြီး ဖော်ထုတ်ပြဖို့ မရဲရင့် နိုင်တော့ပေ။ မြန်မာ စစ် အစိုးရ အတွက်တော့ အခြေအနေ အရပ်ရပ်သည် "မျက်ဖြူဆိုက်လေ၊ ဆရာကြိုက်လေ"ဆိုသော စကားအတိုင်း Good ပြီးရင်း Good နေတော့သည်။
စစ် အစိုးရ အဆိုပြုထားသော ဖွဲ့စည်းပုံ ဥဒေသစ်အရ လွှတ်တော် အမတ်နေရာ ၄၄၀ ကို ပြည်သူ့ ပါလီမန်က ရွေးကောက် တင်မြှောက်ပြီး ၂၂၄ နေရာကို အမျိုးသား ပါလီမန်က ရွေးချယ်မည် ဖြစ်သည်။ အမတ်နေရာ စုစုပေါင်း၏ ၂၅ ရာခိုင်နှုန်း ကိုသာ တပ်မတော် က ရရှိမည် ဟု ဖော်ပြ ထားသည်။ သို့သော်လည်း ပါတီများ အားလုံးလိုလို သည် စစ်အစိုးရ ဘက်တော်သား ခိုင်းရာလုပ်၊ စေရာသွား လူတန်းစားများ သာ ဖြစ်မည်ဆိုသည်ကို လူတိုင်း ရိပ်မိပြီး ဖြစ်ပါသည်။ စစ် အစိုးရ သည် ပြည်သူ ကို နားလှည့်ပြီး ပါးရိုက်ခြင်း သာ ဖြစ်ကြောင်း ကိုလည်း တစ်ကမ္ဘာလုံး သိကြ ပါသည်။ ဗိုလ်ချုပ်ကြီး အနေနှင့် မြန်မာ့ ပြည်တွင်းရေး ကို လက်နက် အားကိုး နှင့် အကောင်းဆုံး ထိန်းချုပ်နိုင်မည် ကို သဘောပေါက် ထားသလို နိုင်ငံတကာ ဖိအားများ ကိုလည်း ရေးကြီးခွင်ကျယ် ဂရုစိုက်ဖို့ မလိုကြောင်း သေသေချာချာ သိထား ခဲ့သည်။ ထို့ကြောင့်လည်း ၎င်း စိတ်ကြိုက် ပုံသွင်း ထားသည့် ရွေးကောက်ပွဲ ဥပဒေကို "ဘယ်သူတေတေ၊ ငတေမာလျင်ပြီးရော"ဟူသည့် စကားကို လက်ကိုင်ထားကာ ဆက်လက် အကောင်အထည် ဖော်နေခြင်း ဖြစ်ပါသည်။
ပြည်သူ အချို့ကလည်း အပြောင်းအလဲ အချို့ ဖြစ်လာနိုင်သည်ဟု မျှော်လင့်ချက် ထားနေကြသည်။ ဥပမာ အားဖြင့် လွတ်လပ်မှု အတိုင်းအတာ တစ်ခုအထိ တိုးတက် ရရှိလာမည်ဟု ယုံကြည် နေကြသည်။ ဥပမာ အားဖြင့် သတင်း လွတ်လပ်ခွင့် ကဲ့သို့သော အခွင့်အရေးမျိုး၊ အခြားသော စက်မှု နှင့် စီးပွားရေး ကဏ္ဍများ တွင် ပိုမို လွတ်လပ်စွာ လုပ်ကိုင် လာနိုင်မည့် အခွင့်အရေးမျိုးများ ရရှိ လာနိုင်မည်ဟု စိတ်ကူး ယဉ်နေ ကြသည်။ စက်တင်ဘာ လူသတ်ပွဲ အတွင်း ကမ္ဘာသိ အောင် လူမဆန်ခဲ့သော စစ်အစိုးရ အနေ နှင့် နိုင်ငံတကာ ၏ ပြစ်တင် လက်ညှိုးထိုး နေမှုကို အာရုံလွှဲရန် ထိုသို့သော လုပ်ပိုင်ခွင့် အချို့ကို ဖွင့်ပေးခြင်း ဖြင့် လှည့်ကွက် တမျိုး ပြောင်းမသုံးဟု မပြောနိုင် သဖြင့် ၎င်းတို့ ၏မျှော်လင့်ချက်များ အကောင်အထည် မပေါ်လာဟု ဆိုရန်မှာ လည်း ခက်ခဲ နေဆဲဖြစ်သည်။
စစ် အစိုးရ သည် ပြည်သူ လူထုကို ခြိမ်းခြောက် အနိုင်ကျင့်ကာ ထောက်ခံမဲ များ ကောက်ခံပြီး မဲ အရေအတွက် ၉၀ ရာခိုင်နှုန်းကျော် ရရှိကြောင်း ကြေညာ ခဲ့သည်။ နာဂစ် ဆိုင်ကလုန်း မုန်တိုင်းကြီး ကြောင့် နိုင်ငံ သမိုင်းတလျှောက် အဆိုးရွားဆုံး သေကြေ ပျက်စီးမှုများ ကြုံတွေ့ နေသည့်တိုင် စစ် အစိုးရ သည် ပြည်သူ လူထု၏ သဘာဝ ဘေးဆိုးတွင် နစ်မွန်းနေမှု ကို ဥပေက္ခာပြုကာ ထောက်ခံ မဲ ရရေးကိုသာ လုံးပမ်း နေသဖြင့် တကမ္ဘာလုံး က စက်ဆုပ်စွာ ဝေဖန် ခဲ့ကြသည်။ သို့သော်လည်း ဗိုလ်ချုပ် မှူးကြီး သန်းရွှေ ကမူ အေးအေး ဆေးဆေးပင်။ အရှက်မရှိ သဖြင့် အစိုးရ လုပ်နေသော အာဏာရူးကြီး သည် နိုင်ငံတကာ ဖိအားများ ကို ဖြေရှင်းခြင်း မပြုသလို စိတ်ထင်တိုင်း ကြဲနေသည့် အပြုအမူများ ကိုလည်း ရပ်တန့်ခြင်း မရှိပါ။ ထို့ကြောင့်လည်း ၂၀၁၀ ရွေးကောက်ပွဲ ကို အတိုက် အခံပါတီ ဟူ၍ လုံးဝမရှိဘဲ တရားမျှတစွာ ကျင်းပမည် ဖြစ်ကြောင်း အသံကောင်း ဟစ်နေဆဲ ဖြစ်ပါ သည်။ သန်းရွှေ တစ်ယောက် ဘယ်လမ်း ကိုလျှောက်နေကြောင်း လူတိုင်း သိပါသည်။ သို့သော်လည်း ထိုလမ်း ကို ပိတ်ဖို့ ကိုမူ မည်သူမျှ မတတ်နိုင်သေး သည်ကို နာကျင်စွာပင် သဘောပေါက်ကြမည်သာ။
၂၀၁၀ ရွေးကောက်ပွဲသည် ဒေါ် အောင်ဆန်း စု ကြည် အတွက် အခွင့်အရေး မရှိသလို ပြည်သူများ ကလည်း မလိုလား၊ မနှစ်သက်သော အဓမ္မ လုပ်ဆောင်မှု တခုသာ ဖြစ်သော် လည်း ထို ရွေးကောက် ပွဲကြီး ကျင်းပမည့် ကာလသည် တစထက်တစ နီးကပ် လာနေပြီ ဖြစ်သည်။ "တရားကို နတ်စောင့်သည်" ဆိုသော စကားသည် မြန်မာ့ နိုင်ငံရေး အတွက် တိမ်ဖုံးသောလ ဖြစ်နေပြီလော မပြောတတ်ပါ။ ဘုရားမဲ့ ဝါဒီ စစ် အစိုးရ ခေါင်းဆောင် ဦးသန်းရွှေ သည် ၂၀၁၀ ရွေးကောက်ပွဲကြီး အပြီးတွင် အာဏာရှင်စနစ် အုပ်ချုပ်ရေးမှ သက်ဦးဆံပိုင် အုပ်ချုပ်ရေးသို့ အောင်မြင်စွာ ပြောင်းလဲပစ်နိုင်ရေး ဒီမိုကရေစီ ဟု ကြွေးကြော် နေဆဲသာ ဖြစ်ပါ တော့သည်။
No comments:
Post a Comment